截的士按乘客要求載到目的地收錢，看似是簡單易懂的事，但卻讓不少港人處處碰釘，原因之一不是的士司機拒載話唔過海，就是全程車「黑起塊面」對著你，讓你搭車搭得不自在，完全是貼錢買難受。難怪有網民在討論區中大呻，指搭的士短途幾分鐘收 $24 就睇面色；過海長途車成嚿水又唔鍾意；中途車收 $50 至 $60 又嫌三嫌四，更詢問一眾網友「其實幾錢車程啲的士佬先會鍾意？」結果引來一眾網民熱論。
- 搭的士搭短短睇面色，搭長途車就拒載唔過海
- 有網民因此求問「幾錢車程的士佬先鍾意？」
- 結果引來其他網民熱烈討論
有網民對於的士司機嫌三嫌四，完全是心態問題，覺得世界圍住佢哋轉。更有網民直接指，最好乘客左邊車門上去，放低 $500 再由右邊車門落車，送錢畀佢哋使就最好。亦有網民吐苦水，指自己搭 $24 車費，因無散紙畀 $100 紙幣找續，同樣要受司機面色。
有網民就剖析的士司機的心態之餘，更提出搭的士的方法，指在的士站搭短途最易受氣，原因是司機排咗廿零分鐘，結果得個短途客，所以會黑面唔出奇，要搭短途可以在的士站附近位置截車，受氣機會會大減。另外，為何的士司機拒載過海客，有網民就指出有些司機怕塞紅隧所以拒載，過海時可提出行其他隧道，應會較易搵到車。亦有所謂「港艇」只揸香港島的司機，怕過海後接唔番乘客回港島，因此造成不少司機會拒載唔過海。
另外，有表示自己是的士司機的網民現身回答，指自己揸的士邊度都去，過海九龍新界亦得，但就經常畀乘客問及過唔過海問到煩。此外，該名的士司機更指九龍過海後確係畀班「港艇」司機玩死，搞到十個港島客九個都唔過海，極難先撞到有一個去九龍的乘客。
